مساء الورد


اليوم بعد الغدا ..
أنبني ضميري لأن اختي مريضة ..

وما أكلت شي من البارحة ..

قلت وش اسوي لها ...

فكرت في شوربة ..

طلعت نص دجاجة ..
وقلت بسوي شوربة دجاج

بس من وين اطلع الوصفة ؟
مو اختصاصي الشوربات يعني

فتحت كتاب طبخ شفته قدامي من قشطة بوك ..
شفت شوربة دجاج بالكريمة ..

بس الوصفة كان ما لها داعي

وقلت بخبص من عندي

تقريباً لكن نفس المكونات ..


المكونات :



حب ذرة
نص دجاجة
ربع قالب زبدة " الي استخدمته وتأسفت إني ما زودت .. يعني خلوه نص او حسب الكمية "
قشطة بوك
طحين
ملح وبهارات ..


الطريقة :


نسلق الدجاج ..
ونضيف له بهارات .. صحيحة ومو صحيحة .. والملح طبعاً ..


بعدين ننتفه

ونخلي الماي على جنب " تقدرو تستخدمو مكعبات ماجي "



ونذوب الزبدة ..




ونضيف عليها الدجاج والذرة ..




يفضل انها تكون واجد عشان الطحين ..




بعدين نضيف الطحين ونخلط " زي البشامل " ..




ونضيف لهم مرقة الدجاج تدريجياً ..



" كان المفروض تكثف بس ما كثفت واجد ويايي من غلطي من البداية "



اخر شي نضيف القشطة ونخليها خمس دقايق على نار هادية ..



قدمت وياها خبز بالثوم ..


الطريقة :



نفرم بقدونس وكم فص ثوم
وشوي زبدة مذوبة






وناخذ صمول .. ونقطعه أكثر من قطعة بالطول ..

ونحطه في صينية
وندهنه بالخلطة " البقدونس والثوم والزبدة "




اخر شي نجيب جبنة شيدر مطبوخة أو موزاريلا

ونبشرها ونحطها فوقهم




وندخلها الفرن تتحمر ..



بس وبالعافية


أغلاطي إلي ما بعيدها ..

1- ما بستخدم مرقة الدجاج وبستغني عنها بماجي.. ما احب الدجاج مرة صرت .. " أحس إلي يطبخ غير الي ياكل إلي يطبخ يشوف كل المراحل يعني "
2- بحاول أخليها كريمية أكثر .. يعني بكثر الزبدة عشان تصير بشامل أو يمكن أضيف نشا
3- بس